Hundur í Hong Kong er kominn í einangrun eftir að COVID-19 kórónuveiran greindist í honum. Óvíst er þó hvort hundurinn sé í raun og veru smitaður en yfirvöld taka enga áhættu.

Í frétt Reuters, sem fjallar um þetta óvenjulega mál, kemur fram að strokur úr nefi og kjafti hundsins hafi gefið „veika“ en þó jákvæða niðurstöðu.

Tekið er fram að hundurinn sé einkennalaus og munu frekari prófanir fara fram til að ganga úr skugga um hvort eitthvað í umhverfinu hafi valdið þessari niðurstöðu. Eigandi hundsins, sextugur einstaklingur, greindist með kórónuveiruna.

Ekki er vitað til þess að gæludýr, til dæmis hundar og kettir, geti borið veiruna en í frétt Reuters kemur fram að þar til frekari upplýsingar liggja fyrir verði ekki tekin nein áhætta. Hundurinn verður í einangrun næstu tvær vikurnar.