Yang hefur átt afar farsælan feril og hann vann til dæmis til gullverðlauna í 200 metra skriðsundi á Ólympíuleikunum í Ríó árið 2016. Þá fékk hann silfur í 400 metra skriðsundi. Þá hefur hann unnið til fjölmargra gullverðlauna á heimsmeistaramótum og er að öðrum ólöstuðum einn þekktasti íþróttamaður Kína.
Þetta er ekki í fyrsta sinn sem Yang er dæmdur í bann en hann var dæmdur í þriggja mánaða keppnisbann árið 2014 fyrir notkun ólöglegra efna.
Málið nú snýr að því að Yang neitaði að gangast undir lyfjapróf þegar fulltrúar lyfjaeftirlitsins mættu heim til hans í september 2018. Þá var hann sakaður um að hafa eyðilagt blóðsýni sem tekið var úr honum á síðasta ári.
Alþjóða íþróttadómstóllinn leit málið mjög alvarlegum augum og í ljósi fyrra brots hans árið 2014 þótti fullt tilefni til að nýta refsirammann til fulls. Niðurstaðan er því átta ára keppnisbann. Ekki þykir ólíklegt að Sun muni áfrýja þessari niðurstöðu til svissneskra dómstóla, en Alþjóða íþróttadómstóllinn er með aðsetur í Lausanne í Sviss.