Fimmtug dönsk kona, sem býr á Friðriksbergi í Kaupmannahöfn, fór í sjoppu á miðvikudaginn í síðustu viku og bað afgreiðslumanninn um einn lottómiða. Sá sem afgreiddi hana gekk út frá því að hún vildi fá miða í Vikinglottóinu þar sem draga átti í því um kvöldið. En konan ætlaði að kaupa miða í laugardagslottóinu. Þetta reyndist mjög gott fyrir konuna því hún fékk sem nemur 89 milljónum íslenskra króna í vinning á miðann.
Í fréttatilkynningu frá danska lottóinu segir að konan hafi ekki þorað að líta af vinningsmiðanum eftir að hún uppgötvaði að hún hafði dottið í lukkupottinn. Hún geymdi miðann í litlu Tupperwareboxi og leit varla af því þar til hún mætti á skrifstofu lottósins til að sækja vinninginn.
„Þetta var svolítið stressandi, það verð ég að játa.“
Er haft eftir konunni.