Þetta er fyrsta tilfellið sem vitað er um í Japan þar sem sami einstaklingur greinist með veiruna tvisvar, að því er segir í frétt breska blaðsins Guardian. Sambærileg dæmi hafa þó komið upp í Kína.
Konan greindist með veiruna öðru sinni í gær eftir að hafa kvartað undan brjóstverkjum og særindum í hálsi.
Um 80 þúsund manns á heimsvísu hafa nú greinst með veiruna og tæplega 2.800 hafa látist, langstærstur hluti þeirra í Kína. 186 manns hafa nú greinst með veiruna í Japan, til viðbótar við þá rúmlega 700 sem greindust á skemmtiferðaskipinu Diamond Princess.
Philip Tierne, prófessor við læknadeild New York University, segir að margt sé enn á huldu um COVID-19 veiruna. Veiran geti þó enn verið í líkamanum þó flest bendi til þess að viðkomandi hafi náð sér. Þannig virðist hún geta verið óvirk eða í hálfgerðum dvala en síðan látið á sér kræla að nýju.