Bernie Sanders stendur sterkt að vígi í baráttunni um að verða forsetaframbjóðandi demókrataflokksins. Hann kom nýlega fram í fréttaskýringaþættinum „60 Minutes“ þar sem hann ræddi mörg mál.

Hann sagði meðal annars að ef hann verður kjörinn forseti sé hann reiðubúinn til að hitta Kim Jong-un, einræðisherra í Norður-Kóreu, og aðra andstæðinga Bandaríkjanna. Hann sagði það ekki vera slæmt að sínu mati að hitta fólk sem er andvígt Bandaríkjunum.  Hann sagðist telja að fundir Donald Trump, núverandi forseta, með Kim Jong-un hafi ekki verið nægilega undirbúnir. Hér hafi verið um ljósmyndasýningu að ræða, það hafi vantað alla nauðsynlega vinnu stjórnarerindreka til að fundirnir gætu skilað árangri.

Sanders hefur áður hrósað Trump fyrir að hitta norður-kóreska leiðtogann en hann hefur einnig gagnrýnt utanríkisstefnu Trump harðlega. Hann segir að hernaðaríhlutanir eigi að vera síðasta úrræðið sem gripið er til.

Í þættinum sagði Sanders að hann myndi beita hervaldi, ef hann væri forseti, ef Bandaríkjunum eða bandamönnum þeirra víða um heiminn væri ógnað. Þegar hann var spurður hvernig hann myndi bregðast við ef Kínverjar réðust á Taívan sagði hann að hervaldi yrði beitt í samvinnu við önnur ríki.