Loftslagsmálin eru fyrirferðarmikil í hinni daglegu umræðu og miklar og heitar umræður fara oft fram um þau á samfélagsmiðlum. Nú hefur ný rannsókn leitt í ljós að um fjórðungur allra tísta um loftslagsmál á Twitter koma ekki frá fólki af holdi og blóði heldur yrkjum (bottum).

Yrkjar eru tölvuforrit sem geta eiginlega dulbúið sig sem fólk með það að markmiðið að skrifa tíst eða senda skilaboð á samfélagsmiðlum. The Guardian skýrir frá þessu. Fram kemur að samkvæmt greiningu vísindamanna hjá Brown University á milljónum tísta frá þeim tíma sem Donald Trump, Bandaríkjaforseti, tilkynnti að Bandaríkin myndu draga sig út úr Parísarsáttmálanum um loftslagsmálin hafi tilhneiging yrkja verið að hrósa aðgerðum forsetans og þannig dreifa fölskum upplýsingum um vísindalegar staðreyndir tengdar loftslagsmálunum.

6,5 milljónir tísta voru greind til að skoða hversu mikið af þeirri umræðu, sem átti sér stað í kringum loftslagsmálin, var í raun og veru frá Twitternotendum komin. Í ljós kom að fjórðungur tístanna kom frá yrkjum.

5 prósent af tístunum, sem komu frá yrkjum, snerust um að hvetja til meiri aðgerða í loftslagsmálum en afgangurinn snerist um að reyna að afneita vísindalegum staðreyndum og rannsóknum á þessu sviði.