Um þúsund manns eru sagðir dvelja á hótelinu en í þeim hópi eru sjö Íslendingar. Þá eru fleiri Norðurlandabúar á hótelinu og talsverður fjöldi af Bretum.
Sky News ræddi við tvo breska gesti sem dvelja á hótelinu og segjast þeir litlar upplýsingar hafa fengið um málið. Í fréttum spænskra fjölmiðla kemur að laganna verðir, gráir fyrir járnum, standi vörð við hótelið og tryggi að enginn komist inn og enginn komist út.
„Það eina sem okkur hefur verið sagt er að við þurfum að halda okkur inni á herberginu,“ segir breskur ferðamaður sem dvelur á hótelinu í samtali við Sky News. Annar Breti segir að einu upplýsingarnar sem þeir hafa fengið sé að finna á miða sem rennt var undir hurðina hjá þeim. Á honum stendur að fólk þurfi að halda sig inni á herbergjum hótelsins af heilsufarsástæðum. Þessi sami gestur segir að ekki hafi náðst samband við móttöku hótelsins til að fá frekari svör.