Bernard Rebelo, 32 ára, svarar þessa dagana til saka fyrir dómi í Bretlandi. Hann er ákærður fyrir að hafa orðið Elosie Parry, 21 árs, að bana með því að hafa selt Parry „megrunartöflur“ sem urðu henni að bana. Þær innihéldu meðal annars eiturefni, DNP, sem var notað í sprengjur í síðari heimsstyrjöldinni.

Sky skýrir frá þessu. Fram kemur að Parry hafi glímt við margskonar vandamál, hún þjáðist meðal annars af búlimíu. Hún keypti Dinitrophenol töflur í þeirri von að þær myndu hjálpa henni að grennast. Í þeim var DNP sem hafði þau áhrif að innri líffæri hennar hættu að starfa, hún féll í dá og fékk síðan hjartastopp og lést.

Fyrir dómi kom fram að dauðdagi hennar hefði verið „hræðilegur“. Rebelo neitar sök.

Hann er ákærður fyrir að hafa keypt gult efni frá efnaverksmiðju í Kína. Hann seldi fólki það síðan í töfluformi sem megrunarlyf. Kaupendur voru um allan heim, þar á meðal Parry.

DNP er sagt vera „hreint eitur“  og „fíkniefni djöfulsins“ en það var notað við sprengjugerð í síðari heimsstyrjöldinni. Á spjallvefjum á netinu er efninu líkt við rússneska rúllettu. Þetta tók saksóknarinn í málinu undir fyrir dómi:

„Ef þú tekur það lifir þú það kannski af, kannski deyrðu.“

Parry byrjaði að taka efnið í febrúar 2015 og lést tveimur mánuðum síðar.