Þessum tvítuga tónlistarmanni var spáð bjartri framtíð í rappheiminum, en á ferli sínum hafði hann til dæmis unnið með Travis Scott og Nicki Minaj.
Svo virðist vera sem um innbrot og rán hafi verið að ræða en Jackson var staddur í leiguhúsnæði í Hollywood Hills þegar hópur manna ruddist inn aðfaranótt miðvikudags. Fjórir einstaklingar sáust flýja af vettvangi en lögreglu hefur ekki tekist að hafa hendur í hári þeirra.
Lögregla rannsakar nú tildrög ránsins en ekki þykir útilokað að myndband sem Jackson birti á Facebook hafi varpað ljósi á hvar hann var niður kominn. Í myndbandinu sést Jackson meðal annars opna gjafapoka með dýrum vörum. Og í öðru myndbandi sem birtist skömmu áður sést hann ásamt félaga sínum með seðlabúnt.
Athygli hefur verið vakin á því að heimilisfangið á dvalarstað rapparans sást greinilega í einu af myndböndunum. Hér er aðeins um kenningu að ræða en sem fyrr segir hefur lögregla ekki handtekið neinn vegna málsins. Þá er rannsókn málsins svo til á frumstigi enn sem komið er.
