„Einn versti barnaníðingur Bretlands,“ er sagt um hinn 36 ára gamla David Wilson. Hann er sagður hafa verið í sambandi við allt að 5000 unga stráka víðs vegar um heiminn. Nú hafa lögregluyfirvöld birt myndband af handtöku Wilson en The Sun og fleiri fjölmiðlar á Bretlandi hafa endurbirt myndbandið eða brot úr því.
David sagðist vera táningsstúlka þegar hann talaði við börnin sem voru elst 14 ára en yngst 4 ára. Hann reyndi að fá börnin til að senda sér myndir og kúgaði sum þeirra til að fá myndir af þeim.
Þegar hann kom fyrir dómi í borginni Ipswich þá játaði hann þau 96 brot sem hann var ákærður fyrir á 51 fórnarlambi. Það tók meira en hálftíma að lesa upp allt það sem hann var sakaður um að hafa gert.
Lögregluyfirvöld í Bretlandi segja að mál Wilson sé eitt það stærsta sem rannsakað hefur verið. Þá er sagt að lögregluyfirvöld hafi undir hönum sönnunargögn sem sýna fram á að allt að 500 ungir strákar hafi sent honum barnaníðsefni. Wilson notaðist við myndir af ungum stelpum af netinu sem hann sendi strákunum í skiptum fyrir myndir og myndbönd af þeim.
Tony Cook, yfirmaður barnaníðsmála hjá lögregluyfirvöldum í Bretlandi, segir að Wilson sé valdur að mikilli þjáningu hjá sumum strákanna. „Hann náði að öðlast traust þeirra með því að sannfæra þá um að hann væri í raun ung stelpa sem líkaði við þá. Hann neyddi þá síðan til þess að senda myndir af sér eða öðrum börnum sem hann girntist.“
Wilson hætti ekki að neyða börnin til þess að senda sér myndir þrátt fyrir að þau grátbáðu hann um að hætta. „Í sumum tilvikum sendi hann myndirnar á vini barnanna,“ segir Cook en nokkur fórnarlamba Wilson hafa sagt að þau vilji ekki lifa lengur.
Dómur mun verða kveðinn upp í máli Wilson þann 12. janúar á næsta ári.