Arif Munandar missti eiginkonu sína og þrjá syni auk tuttugu annarra ættingja í flóðbylgjunni sem skall á bænum Banda Aceh á Súmötru. Hún var 12 metra há. En nú hafa Arif og fjöldi annarra fengið leyfi hjá yfirvöldum til að byggja á nýjan leik á þessu láglendissvæði í Banda Aceh þrátt fyrir að önnur flóðbylgja geti riðið yfir hvenær sem er. Danska ríkisútvarpið skýrir frá þessu.
Embættismenn og sérfræðingar segja að leyfin séu gefin út þar sem indónesísk stjórnvöld hafi ekki getu til að framfylgja banni við byggingu á þessu svæði og mörgum öðrum sem urðu illa úti í flóðbylgjunni. Einnig hefur það áhrif að íbúarnir vilja ekki flytja búferlum.
Nú eru 25.000 byggingar, þar á meðal íbúðarhús, atvinnuhúsnæði, opinberar byggingar og skólar, á mesta hættusvæðinu en það lagðist gjörsamlega í rúst í flóðbylgjunni miklu 2004. Embættismenn telja að um 50.000 manns búi á þessu svæði eða álíka fjöldi og fyrir flóðbylgjuna.
Í kjölfar flóðbylgjunnar íhuguðu indónesísk stjórnvöld að banna allar byggingframkvæmdir innan tveggja kílómetra frá ströndinni. En hætt var við þetta eftir að íbúarnir, sem lifa á fiskveiðum, efndu til mótmæla. Í staðinn fengu íbúarnir bætur svo þeir gætu byggt hús sín á nýjan leik. Ríkið eyddi einnig háum fjárhæðum í að byggja hús í bænum, á hættusvæðinu.