Íbúar í smábæ einum í Oregon í Bandaríkjunum leggjast hart gegn áformum Facebook um að sæstrengur, sem fyrirtækið hyggst leggja, komi að landi við bæjarmörkin og tengist landstöð.

Bærinn sem um ræðir heitir Tierra del Mar en þar eru um það bil 200 hús. Engin umferðarljós eru í bænum og þá er farsímasamband afar stopult, að því er segir í frétt AP.

Facebook vill leggja sæstrenginn sem á að ná frá Bandaríkjunum til Asíu og hafa forsvarsmenn fyrirtækisins sagt að svæðið við Tierra del Mar sé eitt fárra sem koma til greina á vesturströnd Bandaríkjanna vegna lagningar sæstrengsins.

Íbúar á svæðinu hafa lýst áhyggjum af hugsanlegum framkvæmdum; þeim fylgi mikið jarðvegsrask og það geti haft áhrif á undirstöður húsa og rotþróarkerfið. Þá benda þeir á að lífríki við ströndina sé viðkvæmt og ef framkvæmdir verði leyfðar muni opnast flóðgáttir annarra framkvæmda.

Það sem gerir baráttu íbúa erfiðari en ella er sú staðreynd að Facebook á lóð skammt frá bænum sem keypt var árið 2018. Forsvarsmenn Facebook segja að framkvæmdir á svæðinu muni taka um það bil mánuð og afleiðingar þeirra verði litlar sem engar.