Í Svíþjóð verður drengjum boðið að fá HPV-bólusetningu frá og með næsta hausti en stúlkum hefur staðið bólusetning sem þessi til boða í nokkur ár. Það hefur vakið athygli að Svíar ákveði nú að bjóða upp á þessar bólusetningar fyrir drengi því Alþjóðaheilbrigðismálastofnunin WHO hefur varað við því vegna skorts á bóluefninu. Sá skortur kemur verst niður á konum í fátækari ríkjum heims.

Sænska ríkisútvarpið skýrir frá þessu. Stúlkum hefur staðið þessi bólusetning til boða en HPV getur orskaða leghálskrabbamein. Sænsk heilbrigðisyfirvöld telja að hægt sé að koma í veg fyrir 120 til 130 krabbameinstilfelli á ári ef drengir verða einnig bólusettir.

WHO hefur áhyggjur af þessum fyrirætlunum Svía vegna skorts á bóluefni en síðasta haust ráðlagði WHO öllum ríkjum heims að hætta að bólusetja drengi gegn HPV. WHO segir að skortur á bóluefni geti orðið til að lágtekjulönd, þar sem níu af hverjum tíu tilfellum leghálskrabbameins koma upp, eigi í erfiðleikum með að halda sig við bólusetningaráætlanir sínar. Af þeim sökum eigi að setja stúlkur í forgang.

Sænska ríkisútvarpið hefur eftir Anders Tegnell, deildarstjóra hjá heilbrigðisráðuneytinu, að greining WHO sé alveg rétt en ekkert tryggi að þótt drengir verði ekki bólusettir í Svíþjóð fari bóluefnið til stúlkna í fátækari ríkjum.