Það er ekki á hverjum degi sem maður sér 3,5 kílómetra háan mann. En í eyðimörkinni nærri bænum Marree í norðurhluta South Australia í Ástralíu er hægt að sjá einn slíkan. Maðurinn er búinn til úr jarðvegi. Hann uppgötvaðist 1998 af flugmanni sem flaug yfir svæðið. Bandaríska geimferðastofnunin NASA birti nýlega mynd af manninum en hún var tekin í júní á síðasta ári.

Þetta kemur fram í fréttatilkynningu frá NASA. Ekki er vitað hver bjó manninn, sem er nefndur Marree Man, til. Því hefur verið velt upp hvort listamenn frá Alice Springs hafi verið að verki en enginn hefur viljað gangast við því.

Listaverkið var við það að hverfa vegna ágangs vinds en nú eru um 30 sm djúpar útlínur þess sjáanlegar á nýjan leik. Ástæðan er að kaupsýslumaður á svæðinu ákvað 2016 að borga fyrir að láta skerpa útlínur listaverksins.

Hann hefur einnig heitið sem svarar til um 400.000 íslenskra króna í verðlaun fyrir upplýsingar um hver gerði listaverkið en málið er af sumum talið vera ein stærsta ráðgáta samtímans.