Á fyrstu níu mánuðum síðasta árs náðu tölvuþrjótar og aðrir óprúttnir aðilar að stela 24 milljónum danskra króna, sem svarar til um 440 milljóna íslenskra króna, af bankreikningum Dana. Árið á undan stálu þeir 14 milljónum svo aukningin er mikil á milli ára.

Politiken skýrir frá þessu og byggir á tölum frá samtökum banka og fjármálafyrirtækja. Almennt ná þrjótarnir að stela peningum af reikningum fólks eftir að hafa hringt í það og náð að lokka persónulegar upplýsingar út úr því. Þeir beina sjónum sínum sérstaklega að eldra fólki. Talsmaður samtaka banka og fjármálafyrirtækja sagði að greinilegt sé að konur yfir sextugu séu vinsælustu fórnarlömbin. Svo sé að sjá að glæpamennirnir telji að í þessum aldurshópi sé fólk sem er viðkvæmt og óreynt hvað varðar tölvunotkun og því felist bestu tækifærin í að svíkja það.

Á fyrstu níu mánuðum síðasta árs var tilkynnt um tæplega 700 þjófnaði af bankareikningum fólks en 2018 voru málin um 1.400. Þjófunum tókst því að stela hærri upphæðum í hvert sinn á síðasta ári en 2018.