Þegar Edward Snyder var á heimleið skömmu fyrir áramót stoppaði hann í Food Lion matvöruverslun í Mooresville sem er norðan við Charlotte í Norður-Karólínu í Bandaríkjunum. Hann langaði svo í gúllas að hann ætlaði að kaupa það sem til þurfti í gúllasið. Þegar hann kom á afgreiðslukassann ákvað hann að kaupa sér lottómiða og það skilaði ansi góðum árangri því hann vann eina milljón dollara, sem svara til um 120 milljóna íslenskra króna, á miðann.

Snyder segir að honum hafi fundist sem þetta væri góður dagur og að hann hefði heppnina með sér og því hefði hann ákveðið að kaupa Cash 5 lottómiða.

„Ég varð að skoða miðann að minnsta kosti 15 sinnum áður en ég trúði þessu. Ég sendi konunni minni skilaboð en hún trúði þessu heldur ekki. Þetta er frábær jólagjöf og ótrúlegt að byrja nýja árið svona.“

Sagði hinn heppni vinningshafi þegar hann ræddi við starfsmenn lottósins. Hann fékk rúmlega 750.000 dollara greidda út en restin fór til skattayfirvalda sem vildu fá sinn hluta af vinningnum.