Skólatannlæknar í Esbjerg í Danmörku uppgötvuðu á síðasta ári að mörg skólabörn voru með skaddað tannhold og slímhimnu í munni en þetta eru dæmigerð merki um notkun á munntóbaki (snúsi).

Þetta varð til þess að síðasta hálfa árið hafa tannlæknarnir rannsakað notkun munntóbaks 12 til 18 ára barna og unglinga. Í umfjöllun Danska ríkisútvarpsins um málið er haft eftir Charlotta Pisinger, prófessor í tóbaksvörnum við Kaupmannahafnarháskóla, að full ástæða sé til að rannsaka þetta því notkun á munntóbaki geti haft alvarlegar afleiðingar.

„Snús er mjög ávanabindandi. Margar rannsóknir sýna að heilar barna verða fyrir tjóni af völdum nikótíns. Ef maður notar snús daglega aukast líkurnar á að fá krabbamein og aðra lífsstílssjúkdóma.“

Er haft eftir henni.

Ekki liggja fyrir neinar nákvæmar upplýsingar um notkun grunnskólanema á snúsi og því eru allir á aldrinum 12 til 18 ára í Esbjerg nú spurðir út í notkun þeirra á snúsi og/eða vitneskju um slíka notkun annarra.