Dómstóll í San Diego í Bandaríkjunum hefur dæmt eigendur og framkvæmdastjóra klámsíðunnar GirlsDoPorn til að greiða tæplega 20 konum sem nemur 1,5 milljarði íslenskra króna í bætur. Konurnar stefndu klámsíðunni og sögðust hafa verið blekktar til að leika í klámmyndum án þess að vita að þær yrðu birtar á internetinu.

Myndböndin voru birt á heimasíðu GirlsDoPorn og enduðu síðan á stórum klámsíðum á borð við Pornhub.

The Guardian segir að dómarinn, Kevin Enright, hafi komist að þeirri niðurstöðu að hinir stefndu hafi gerst sekir um blekkingar og samningsbrot með því að ljúga að konunum um hvernig dreifingu á myndböndunum yrði háttað. Tæplega tveir tugir kvenna stefndu klámsíðunni. Enright féllst á allar kröfur kvennanna á hendur þeim 13 aðilum sem þær stefndu fyrir dóm vegna málsins. Meðal hinna stefndu eru Michael James Pratt, 36 ára, og Matthew Isaac Wolfe, 37 ára, eigendur síðunnar. Einnig var Ruben Andre Garcia, 31 árs, klámmyndaleikara, stefnt.

Auk bótanna sem Enright úrskurðaði konunum dæmdi hann þeim eignarrétt á myndböndunum sem þær léku í og fyrirskipaði hinum stefndu að fjarlægja þau af vefnum. Hann fyrirskipaði einnig GirlsDoPorn að láta koma fram í öllum auglýsingum eftir leikurum í framtíðinni að myndböndin verði birt á netinu.