Gríðarlegur engisprettufaraldur er nú í Austur-Afríku. Þar ógna milljónir engispretta gróðri á stórum svæðum en þær éta allt sem á vegi þeirra verður. Einn sveimurinn var um 60 kílómetra langur og 40 kílómetra breiður.  Nú stefna engispretturnar á svæði sem hefur verið sagt vera hveitiforðabúr Eþíópíu. Það er ekki á það bætandi fyrir þetta svæði að fá svona stóran engisprettufaraldur því miklir þurrkar hafa verið og gróður og uppskera í lágmarki. Engispretturnar ógna því matvælaörygginu í Austur-Afríku.

FAO, matvælastofnun Sameinuðu þjóðanna, segir að engisprettufaraldurinn ógni matvælaöryggi í Eþíópíu, Kenía og Sómalíu. Mikilvægt sé að takast á við faraldurinn eins fljótt og hægt er og vinna SÞ að því að koma aðstoð til svæðisins. Þörf er á mat fyrir íbúa og skordýraeitri til að drepa engispretturnar. SÞ vara við að ef ekki verður tekist á við faraldurinn geti engispretturnar verið orðnar 500 sinnum fleiri í júní.

„Þær eyðileggja allt sem á vegi þeirra verður. Við viljum að yfirvöld sendi flugvélar sem geta úðað eitri og drepið þær annars eyðileggja þær allt.“

Sagði Esther Ndanu, bóndi, í samtali við AP.

Í hverjum sveimi geta verið mörg hundruð milljónir engispretta og geta þær lagt allt að 150 km að baki á degi hverjum í miskunarlausri leit sinni að fæðu. Meðalsveimurinn inniheldur um 150 milljónir dýra sem geta á einum degið étið uppskeru sem gæti brauðfætt 2.500 manns.