Í ágúst á síðasta ári voru tveir Rússar handeknir í húsunum í Davos í Sviss þar sem Alþjóðaefnahagsráðið fundar árlega. Þegar lögreglan handtók mennina voru þeir að undirbúa uppsetningu njósnabúnaðar í húsunum. Þeir þóttust vera pípulagningamenn en þegar þeir voru handteknir vildi svo ótrúlega til að þeir gátu dregið upp rússnesk diplómatavegabréf.

Þeim var í kjölfarið vísað úr landi. Dagblaðið Tages-Anzeiger komst nýlega á snoðir um þetta. Hefur blaðið eftir heimildamönnum að Rússarnir hafi líklega verið að undirbúa hlerun á einkafundum sem áttu að fara fram mörgum mánuðum síðar, það er á fundi ráðsins nú í janúar.

Talsmaður rússneska sendiráðsins í Bern sagði í samtali við BBC að svissneska dagblaðið hafi verið að reyna að búa til hneykslismál úr engu. Engar sannanir séu til staðar í málinu.

Talskona lögreglunnar sagði að komist hafi upp um mennina við hefðbundið eftirlit lögreglunnar. Þeir hafi verið með rússnesk diplómatavegabréf en hafi ekki verið skráðir sem diplómatar í Sviss.