Faðirinn hafði árum saman beitt stúlkuna, sem er 14 ára og býr í Okaloosa County, ofbeldi en enginn trúði henni. Hún ákvað því að afla sönnunargagna og um jólin setti hún upp falda myndavél á heimilinu til að afla sannana fyrir því sem faðir hennar, hinn 47 ára Damon Becnel, gerði henni.
Hún gat síðan lagt tvær upptökur fram hjá lögreglunni og þann 2. janúar var faðir hennar handtekinn segir í frétt ABC News. Á annarri upptökunni sést hann skalla stúlkna, rífa í hár hennar og henda henni í átt að rúmi og lenti höfuð hennar á rúmgaflinum.
Á hinni upptökunni sést hann draga hníf upp, taka hund kverkataki og öskra:
„Ég ætla að skera þessi helvítis augu úr þessum helvítis hundi.“
Síðan segir hann: „Það er ég sem ræð hér.“ Því næst hrindir hann stúlkunni í gólfið og segir henni að halda kjafti þegar hún byrjar að öskra.
ABC News hefur eftir móður stúlkunnar að stúlkan hafi margoft reynt að gera yfirvöldum viðvart um misþyrmingarnar en hún hafi aldrei verið tekin alvarlega. Móðirin hefur ekki forræði yfir stúlkunni.
ABC News segir að stúlkan og hundurinn búi nú hjá nánum vini föður hennar. Faðirinn var látinn laus þann 3. janúar gegn tryggingu upp á 4.000 dollara. Hann á að mæta fyrir dóm í byrjun febrúar þar sem ákæra á hendur honum fyrir ofbeldi gegn barni og dýraníð verður tekið fyrir.