Til þess að leysa vandann ræðir löggjafinn um að setja lög sem muni þvinga alla framleiðendur síma og annarra snjalltækja til að nota staðlaðan hleðsluinngang á tækjum sínum.
„Til að draga úr rusli frá raftækjum og til að einfalda líf neytenda vilja meðlimir Evrópuþingsins setja lög sem myndu tryggja að hleðslutæki myndu passa fyrir alla farsíma og önnur snjalltæki“ segir í fréttabréfi á heimasíðu Evrópusambandsins.
Í yfirlýsingunni kemur fram að „hleðslutæki eigi að henta öllum farsímum, spjaldtölvum, lesbrettum og öðrum snjalltækjum“. Einnig kemur fram í yfirlýsingunni að Evrópusambandið geri ráð fyrir því að gömul hleðslutæki og snúrur skapi yfir 51.000 tonn af rusli á ári.
Hleðslutækið sem líklegast er að verði fyrir valinu er af tegundinni USB-C, flestir símaframleiðendur, að Apple undanskildu, nota þessi tæki.
Apple hefur verið þekkt fyrir að vilja nota eigin lausnir fyrir tæki sín. Fyrirtækið er engu að síður farið að nota USB-C fyrir nýjustu Mac- og iPad tæki sín.
Þrátt fyrir að lögin um stöðluð hleðslutæki ná fram að ganga mun Apple aðeins þurfa að fylgja þeim innan landa Evrópusambandsins. Kostnaðurinn við þessar breytingar mun þó líklega verða til þess að breytingarnar verði á heimsvísu.
Í yfirlýsingu frá Apple segir að breytingin muni hafa í för með sér gríðarlegt magn af rusli og muni koma sér illa fyrir neytendur. Sagt er að Apple vinni nú að því að framleiða síma án hleðsluinngangs, sem aðeins verði hægt að hlaða þráðlaust.
