Danska lögreglan hefur að undanförnu safnað lífsýnum úr ungum mönnum, sem búa við Motalavej í Korsør, í tengslum við rannsóknina á hvarfi og morðinu á Emilie Meng þann 10. júlí 2016. Lögreglunni hefur fram að þessu ekki orðið neitt ágengt við rannsókn málsins sem þykir ákaflega dularfullt.

Motalavej er eitt af svokölluðum gettóum í Danmörku þar sem mörg félagsleg vandamál eru uppi og hlutfall innflytjenda er hátt. Samkvæmt frétt TV2 þá sagði þroskaheftur maður lögreglunni að piltar úr hverfinu hefðu tekið Emilie. Þetta sagði hann lögreglunni sama dag og Emilie hvarf. Maðurinn býr á Motalavej, við göngustíginn þar sem Emilie hvarf.

Í heimildamynd Danska ríkisútvarpsins um málið sagði maðurinn að hann hafi heyrt stúlku öskra þennan morgun og segja „halló“ hátt. Þetta sagðist hann hafa sagt lögreglunni og að „strákarnir hefðu tekið hana“. Lögreglan staðfesti að maðurinn hefði sagt þetta.

Lögreglan hefur kallað fjölda ungra manna úr hverfinu til skýrslutöku að undanförnu og farið fram á að þeir láti lífsýni í té. Lögreglan vill ekki svara hvort þetta tengist framburði þroskahefta mannsins.

Eins og fyrr segir hvarf Emilie að morgni 10. júlí 2016 þegar hún var á leið heim eftir næturskemmtun með vinkonum sínum. Lík hennar fannst í vatni við Regnemarks Bakke við Borup á aðfangadag 2016.