Frá 2013 starfaði Hussien Mehaidli, 27 ára Kanadamaður, sem yfirmaður hjá fyrirtækinu Fastebal sem selur ýmsa vélarhluti og annað til iðnaðarfyrirtækja. Öll þessi ár hafði hann fengið stóra gjafakörfu fulla af ýmsu góðgæti í jólagjöf frá fyrirtækinu. En fyrir síðustu jól var gjöfin svolítið öðruvísi. Þá fengu starfsmennirnir eina flösku af grillsósu eins og sést á meðfylgjandi mynd.

Þetta fannst Mehaidli ansi aum jólagjöf og lái honum hver sem vill.

„Mér fannst ég hafa gefið þessu fyrirtæki svo mikið og fannst sem mér væri sýnd óvirðing þegar ég fékk grillsósu í jólagjöf.“

Sagði hann í samtali við CTV News.

Hann var svo ósáttur við gjöfina að hann ákvað að birta mynd af henni á Twitter og skrifa um óánægju sína. Hann gerði það undir leyninafni. En daginn eftir hringdi yfirmaður hans í hann og kallaði hann þá ekki Hussien heldur Minipat sem er notandanafnið á Twitteraðganginum sem hann notaði til að gagnrýna jólagjöfina. Þá áttaði hann sig á að hann hafði eitt sinn deilt mynd á þeim aðgangi sem var tekin við borðið hans í vinunni. Af þeim sökum komst upp um hann.

Tíu dögum eftir að hann skrifaði færsluna var hann boðaður á fund og sagt upp störfum.