Madsen kvæntist fyrri eiginkonu sinni 2011 og ólíkt því sem nú var þá fór sú athöfn fram að fjölmenni viðstöddu. Nú gekk hann í hjónaband í Herstedvester fangelsinu í Albertslund þar sem hann afplánar dóm sinn.
Nýja eiginkonan heitir Jenny Curpen og er frá Moskvu í Rússlandi segir í umfjöllun Ekstra Bladet. Segir blaðið að parið hafi gengið í hjónaband fyrir jól en ekki skýrt frá því á samfélagsmiðlum fyrr en í síðustu viku þegar Facebookstatusum þeirra beggja var breytt til samræmis við breytta hjúskaparstöðu.
Curpen er 39 ára og kom til Kaupmannahafnar þann 18. desember síðastliðinn. Í samtali við Ekstra Bladet staðfesti hún að þau væru gengin í hjónaband en vildi að öðru leyti ekki tjá sig um málið.
Á Instagram hefur hún birt myndir frá Kaupmannahöfn, þar á meðal frá Refshaleøen þar sem Madsen hafði aðstöðu og smíðaði kafbátinn meðal annars. Hún hefur einnig birt myndir af þeim þremur kafbátum sem Madsen smíðaði.
Madsen hefur ekki aðgang að internetinu en vinkona hans skýrði BT frá því fyrir nokkru að hún stýrði Facebookaðgangi hans.
Eftir að Madsen hóf að afplána fangelsisdóm sinn átti hann um hríð í ástarsambandi við konu, sem starfaði sem fangavörður í Vestre fangelsinu. Þegar það komst upp varð hún að láta af störfum.