Íbúar á Saanich skaganum í Kanada eru að sögn glaðir yfir fregnum af nýjum nágrönnum sem þeir munu fá fljótlega. Hermt er að Harry Bretaprins og eiginkona hans, Meghan Markle, ætli að setjast þar að. Það mun væntanlega lífga upp á lífið á skaganum sem er þekktastur fyrir að vera aðsetur ellilífeyrisþega og að þar eru margir veitingastaðir sem sérhæfa sig í fiskréttum.

Hertogahjónin komu öllum í opna skjöldu í síðustu viku þegar þau tilkynntu að þau vildu láta af störfum sínum fyrir bresku konungshirðina, svona að mestu, og flytja vestur um haf. Ýmsir fjölmiðlar hafa síðan skýrt frá því að þau hyggist setjast að á Saanich sem er á Vancouver Island í Bresku Kólumbíu.

Staðsetningin er engin tilviljun því hjónin hafa oft sagt frá hversu mikils þau meta Kanada. Meghan bjó í sjö ár í Kanada og þekkir því landið vel. Það skemmir auðvitað ekki fyrir að Elísabet II Bretadrottning, amma Harry, er þjóðhöfðingi Kanada.

Hjónin voru í sex vikna fríi á Vancouver Island á síðasta ári og nú er Meghan snúin aftur að sögn erlendra fjölmiðla.