Ketó mataræðið hefur á síðustu árum náð miklum vinsældum meðal þeirra sem vilja losna við aukakílóin, en það er ýmislegt sem bendir til þess að mataræðið sé ekki eins gott fyrir þig og þú kannski heldur.

Átralski næringarfræðingurinn, Robbie Clark heldur þessu fram og segir að mataræðið sé aftur á móti slæmt fyrir þig. News.com.au greinir frá þessu.

Robbis Clark sagði í viðtali við news.com.au að ketó mataræðið felist í stuttu máli í því að þú borðar mjög lítið af kolvetnum. Án kolvetna brennir líkaminn nánast eingöngu fitu í stað sykurs. Litið er á ketó mataræðið sem takmarkandi mataræði, gróft korn, belgjurtir, grænmeti með sterkju og ávextir er meðal þess sem ekki má borða.

Þegar maður útilokar margt af því sem telst til fjölbreytts mataræðis, hefur það afleiðingar. Maður fær einfaldlega ekki öll þau næringarefni sem maður þarf á að halda.

Robbie Clark er ekki sá eini sem er á þessari skoðun. Tímaritið US News & World Report, sem birtir á hverju ári lista yfir bestu og verstu kúrana, segir kúrinn þann versta þeim af 35 sem voru til umfjöllunar. Ein af ástæðum þess að hann þótti verstur, auk skorts á mikilvægum næringarefnum, var, að honum fylgja of margar reglur. Auk þess þess þykir hann ekki umhverfisvænn. Það eina sem tímaritið fann jákvætt við ketó mataræðið var að maður léttist ótrúlega hratt. Auk þess segir James Kuhn, annar ástralskur næringarfræðingur, að hann geti verið góður fyrir þá sem eiga erfitt með að stýra matarlist sinni. Ástæða þess er að maður neytir minna magns matar, sem fyllir vel.