Kínverski auðkýfingurinn Cheung Chung Kiu er við það að ganga frá kaupum á lúxuseign í Lundúnum. Ef allt gengur upp mun hann greiða hæsta verð sem greitt hefur verið fyrir fasteign í bresku höfuðborginni. Kiu er enginn viðvaningur á sviði fasteignaviðskipta en auður hans byggist á slíkum viðskiptum.

Samkvæmt frétt Bloomberg ætlar Kiu að greiða 200 milljónir punda, sem svara til um 32 milljarða íslenskra króna, fyrir hús sem stendur við 2-8A Rutland Gate í miðborg Lundúna. Kaupin fara fram í gegnum fasteignaþróunarfélag Kiu, CC Land Holdings.

Um er að ræða sjö hæða hús upp á 5.760 fermetra. Í húsinu eru 45 herbergi. Einnig er einkasundlaug í húsinu, líkamsræktarsalur og bílastæðakjallari. Úr húsinu er útsýni yfir Hyde Park og stutt er til Harrods stórverslunarinnar. Þeir sem eru innandyra ættu að geta fundið til töluverðrar öryggistilfinningar því glerið í húsinu er skothelt.

Fasteignamarkaðurinn í Lundúnum hefur verið leikvöllur erlendra milljarðamæringa um langa hríð og hafa þeir þrýst fasteignaverði í borginni upp og er það á stundum óskiljanlega hátt. Þó hefur þetta breyst á undanförnum misserum og í sumum hverfum hefur verðið staðið í stað undanfarin misseri. Einnig hefur óvissan um Brexit haft sitt að segja.

Af þessum sökum vekja þessi fyrirhuguðu viðskipti mikla athygli. Bloomberg segir að fyrra verðmetið sé 140 milljónir punda.