Það er óhætt að segja að lánið hafi leikið við Alexzandria Wolliston, sem býr í Flórída í Bandaríkjunum, á síðasta ári. Hún eignaðist nefnilega tvíburana Mark og Malakhi í mars. Hún eignaðist síðan aftur tvíbura í desember, Kaylen og Kaleb. Læknar sögðu henni að það væru meiri líkur á að vinna í lottói en að eignast tvenna tvíbura á einu ári.

„Ó, já. Mér líður eins og ég hafi unnið tvisvar í lottói.“

Sagði Wolliston í samtali við WPTV.

Að auki á hún þriggja ára dóttur og segir hún að dóttirin hafi verið góður undirbúningur fyrir tvíburana.

„Hún var miklu verri en þeir. Það var eins og að vera með tvö börn í einu að vera með hana.“

Wolliston fékk að vita að hún gengi aftur með tvíbura tveimur mánuðum eftir að hún eignaðist fyrra parið.