Don Bryden, framkvæmdastjóri hjá fyrirtæki einu á Bretlandseyjum, hefur brugðið á það ráð að gefa þeim starfsmönnum fyrirtækisins sem reykja ekki lengra sumarfrí. Bryden er yfirmaður hjá KCJ Training and Employment Solutions en fyrirtækið sér til að mynda um ráðningar.

Bryden segir að hugmyndin hafi kviknað eftir að hafa orðið þess var að reykingafólk á vinnustaðnum eyddi talsverðum tíma fjarri skrifborðinu, eða allt að klukkustund á dag. Honum hafi ekki þótt það sanngjarnt þegar honum varð litið á sessunautana sem unnu sitt starf samviskusamlega. Honum fannst hann verða að bæta þeim þetta upp með einhverjum hætti.

Niðurstaðan varð því sú að þeir sem reykja ekki fá fjögurra daga lengra sumarfrí. Reykingamenn á vinnustaðnum sem hugsa sér gott til glóðarinnar og vilja hætta að reykja þurfa þó að sýna fram á að þeir séu hættir. Þurfa þeir að vera reyklausir í eitt ár áður en þeim standa aukafrídagarnir til boða.