En ef reynt er að skilja þetta þá blasir við að eldarnir eru forsmekkurinn, aðvörun, um það sem bíður okkar í framtíðinni eftir því sem meðalhitastigið hækkar vegna loftslagsbreytinganna. Þetta segir bandaríski loftslagssérfræðingurinn og prófessorin Christopher Field. Hann er forstjóri umhverfisrannsóknardeildar Stanford háskóla og var meðstjórnandi í loftslagsráði Sameinuðu þjóðanna frá 2008 til 2015.
Hann segir að á þeim svæðum, þar sem nú þegar hefur brunnið og brennur þessa stundina, verði hættan á gróðureldum í framtíðinni enn meiri vegna meiri hita og þurrka. Þetta lengi það tímabil sem eldhætta er og sé ávísun á meira eldsneyti fyrir eldana. Þetta eigi við í Ástralíu og annarsstaðar í heiminum þar sem skógar- og gróðureldar hafa logað á undanförnum misserum. Þar má nefna Kaliforníu, Amazon og við Miðjarðarhafið.
Gróðureldar eru eðlilegur hlutur í Ástralíu en ekki að þessu sinni. Þeir eru hluti af vistkerfinu og margar plöntutegundir eru háðar gróðureldum til að geta spírað og vaxið á nýjan leik. En umfang eldanna að þessu sinni er miklu meira en eðlilegt getur talist en nú hafa rúmlega 100.000 ferkílómetrar lands brunnið. Auk þess byrjuðu eldarnir óvenjulega snemma.
Í september sendi ástralska veðurstofan, BOM, frá sér aðvörun um mikla eldhættu fyrir suðausturhluta Queensland og norðausturhluta New South Wales sem er fjölmennasta ríki Ástralíu. September er fyrsti vormánuðurinn í Ástralíu en yfirleitt kvikna stórir gróðureldar í New South Wales, þar sem eldarnir hafa verið verstir að þessu sinni, seinna á vorin og á sumrin. En síðasta ár var sérstaklega heitt og þurrt í Ástralíu, það hlýjasta og þurrasta síðan veðurathuganir hófust í heimsálfunni.
Samblanda veðurfarslegra atriða er helsta ástæða eldanna að þessu sinni og greina þarf á milli þeirra og loftslagsbreytinganna. Þetta segir bandaríski loftslagssérfræðingurinn Zeke Hausfather, forstjóri loftslagsrannsókna hjá The Breakthrough Institute.
Hann segir að tvær af aðalástæðum hins óvenjulega veðurfars á síðasta ári megi rekja til veðurfyrirbrigðanna Indian Ocean Dipole og Southern Annular Mode. Eðlilegar sveiflur í veðrinu eigi einnig sinn hlut að máli hvað varðar öfgafullt veðurfar á síðasta ári en það hafi skapað skilyrðin fyrir eldunum. Eftir því sem meðalhitinn muni hækka á næstu árum verði fleiri ár þar sem hita- og kuldamet verða slegin segir hann. Hann segir að loftslagsbreytingarnar séu eins og aukaeldsneyti á eldinn á árum þar sem hitinn er mjög mikill. Þær orsaki í sjálfu sér ekki eldana en eigi hlut að máli við að mynda skilyrði fyrir elda sem verða sífellt stærri og meira eyðileggjandi.
Hann telur ólíklegt að hitabylgjan á síðasta ári í Ástralíu hefði orðið í heimi þar sem loftslagsbreytingar væru ekki að eiga sér stað. Christopher Field er þessu sammála.
