Tuttugu og sex ára Þjóðverji lést í vikunni, fjórum árum eftir að hann borðaði samloku sem búið var að setja eitur í. Vinnufélagi mannsins, Klaus O., að nafni setti eitrið í samlokuna en hann var dæmdur í lífstíðarfangelsi á síðasta ári.

Mennirnir störfuðu hjá fyrirtæki í bænum Schloss Holte-Stukenbrock í Þýskalandi. Auk mannsins sem lést í vikunni hlutu tveir aðrir varanlegan nýrnaskaða. Þeir höfðu ýmist innbyrt kvikasilfur, blý eða kadmíum. Þýskir fjölmiðlar greindu frá andláti mannsins í vikunni, en hann féll í dá eftir að hafa innbyrt eitrið og glímdi við mikinn heilsubrest í kjölfarið.

Brot Klaus voru mjög skipulögð og stóðu þau yfir í nokkur ár, að því er fram kom í dómi sem féll í Bielefeld í fyrra.

Klaus var handtekinn í maí 2018 þegar hann sást á eftirlitsmyndavélum koma óþekktu efni fyrir í mat samstarfsfélaga sinna. Við húsleit á heimili hans fundust allskonar hættuleg efni. Hann vildi ekki tjá sig um sakargiftir fyrir dómi og því liggur ekki fyrir hvers vegna hann ákvað að gera það sem hann gerði.