Atlanta, Peking, New York, London eða Tókýó. Þetta eru milljónaborgir með mjög stóra alþjóðaflugvelli sem margar flugvélar fara um daglega. En síðustu helgina í apríl bar svo við að það var Ted Stevens Anchorage alþjóðaflugvöllurinn í Alaska í Bandaríkjunum sem var fjölfarnasti flugvöllur heims.

Ástæðan er auðvitað COVID-19 heimsfaraldurinn og þau miklu áhrif sem hann hefur haft á flugiðnaðinn um allan heim. Í Twitterfærslu frá flugvellinum segir að þetta sýni hversu mikið hefur nú breyst í flugiðnaðinum og hversu mikilvægu hlutverki flugvöllur gegni í hagkerfi heimsins og baráttunni gegn COVID-19.

Ástæðan fyrir þessari miklu flugumferð um völlinn er ekki sú að ferðamenn hafi skyndilega byrjað að leggja leið sína í stórum stíl til Alaska. Það eru miklar annir í tengslum við fraktflug sem valda þessu en staðsetning Anchorage mitt á milli Tókýó og New York er gríðarlega mikilvæg í þessu sambandi.

Í venjulegu árferði er mikil umferð fraktflugvéla um völlinn í Anchorage. Samkvæmt upplýsingum frá flugvellinum fer aðeins meiri frakt, í tonnum mælt, um flugvöllinn í Memphis í Tennessee af bandarískum flugvöllum. Á heimsvísu er völlurinn í fimmta sæti. Umferð um aðra flugvelli hefur hrunið en aukist í Anchorage vegna heimsfaraldursins.