Kona nokkur hóstaði viljandi á ferskvörur í Gerrity‘s stórmarkaðinum í Hanover Township í Pennsylvania í Bandaríkjunum á miðvikudaginn. Starfsfólk brást skjótt við og hringdi í lögregluna sem handtók konuna. Í kjölfarið hósta konunnar þurfti að henda kjöti, bakkelsi og fleiri matvælum að verðmæti sem nemur um fimm milljónum íslenskra króna.

Lögreglan í Hanover Township segir að konan hafi hóstað á matinn af ásettu ráði. Hún verður látin sæta geðrannsókn og á ákæru yfir höfði sér. Ekki er talið að konan sé smituð af COVID-19 veirunni en hún verður samt sem áður látin gangast undir rannsókn á því.

Ekki liggur ljóst fyrir hvaða refsingu konan gæti átt yfir höfði sér en á miðvikudaginn tilkynnti bandaríska dómsmálaráðuneytið að þeir sem dreifa COVID-19 veirunni af ásettu ráði verði hugsanlega ákærðir fyrir hryðjuverk.