Kanadíska fyrirtækið Canopy Growth, sem er stærsti kannabisframleiðandi heims ef miðað er við markaðsverðmæti, ætlar nú að loka gróðurhúsum þar sem hægt er rækta kannabis á um 300.000 fermetrum. Þetta svarar til 40 knattspyrnuvalla.

CNN skýrir frá þessu. Gróðurhúsin eru í Bresku Kólumbíu í Kanada. 500 manns missa vinnuna vegna þessa. Einnig verður hætt við byggingu nýs gróðurhúss í Ontario.

Í tilkynningu frá fyrirtækinu segir að á fyrstu 17 mánuðunum eftir að sala og neysla kannabis var leyfð í Kanada hafi markaðurinn þróast hægar en búist var við. Þetta hafi haft áhrif á tekjur fyrirtækisins og möguleika þess á að útvega sér fjármagn.

Það bætir ekki úr skák fyrir fyrirtækið að kanadísk yfirvöld hafa nú heimilað ræktun kannabis utanhúss. Áður en þetta var heimilað hafði fyrirtækið fjárfest gríðarlega í gróðurhúsum. Fyrirtækið á einnig ræktunarsvæði utanhúss og skila þau miklu betri fjárhagslegri afkomu.