Hessischer Rundfunk segir að saksóknari í Hanau hafi staðfest að átta hafi verið drepnir og að fimm til viðbótar séu alvarlega særðir. Fyrst voru þrír skotnir til bana á vatnspípubar og fimm til viðbótar á öðrum vatnspípubar.
Þungvopnaðir lögreglumenn hafa leitað að árásarmönnunum í alla nótt.
Ekki hafa fengist miklar upplýsingar um atburðarásina en í tilkynningu frá lögreglunni kemur fram að dökur bíll hafi sést aka frá vettvangi.
Samkvæmt frétt Op-online þá var fyrsta árásin gerð á vatnspípubar í miðbænum. Því næst var tilkynnt um skothríð í Kesselstadt sem er utan miðbæjarins. Þar var einnig skotið á gesti á vatnspípubar.
Staðarmiðlar segja einnig að skotárás hafi verið gerð í Lamboy, þriðja staðnum í bænum, en þar hafi enginn látið lífið. Vitni segja að skotum hafi verið hleypt af úr bíl sem var síðan ekið á brott.
Um 98.000 manns búa í Hanau sem er um 25 km vestan við Frankfurt am Main.
Uppfært klukkan 05:00
Samkvæmt tilkynningu sem lögreglan sendi frá sér fyrir stundu fannst hinn meinti árásarmaður látinn heima hjá sér. Þar var einnig annað lík. Ekki hefur verið skýrt frá dánarorsök fólksins né af hverjum hitt líkið er. Lögreglan segir nú að engar vísbendingar séu um að fleiri hafi verið að verki en vinnur enn að rannsókn málsins.
❗ #Update nach #Schießerei in #Hanau ❗
Mutmaßlicher Täter wurde leblos an seiner Wohnanschrift in #Hanau aufgefunden. Zudem entdeckten Spezialkräfte der Polizei dort eine weitere Leiche.
Die Ermittlungen dauern an.
Aktuell gibt es keine Hinweise auf weitere Täter.
— Polizei Südosthessen (@Polizei_soh) February 20, 2020
