Vopnaðir ræningar rændu mörg hundruð klósettpappírsrúllum í Hong Kong á mánudaginn. Þeir sátu fyrir flutningabíl við stórverslun og ógnuðu bílstjóranum með hnífum. Þeir tóku síðan mikið af klósettpappír með sér, að verðmæti sem svarar til á annað hundrað þúsunda íslenskra króna.

Ástæðan fyrir ráninu er væntanlega að erfitt er að verða sér úti um klósettpappír í Hong Kong þessa dagana vegna áhrifa kórónaveirunnar sem herjar á Kína. Fólk hefur birgt sig upp af klósettpappír af ótta við að skortur sé yfirvofandi. Auk klósettpappírs er skortur á hrísgrjónum og pasta og margskonar þrifaefnum.

Verslanir ná ekki að fylla nógu ört á hillur. Langar biðraðir myndast oft við þær og hillurnar eru tæmdar á örskotsstundu þegar opnað er.