Það getur auðvitað verið erfitt fyrir fólk að gista með fílum enda eru þeir engin smásmíði og líklegast ekki gott að fá einn slíkan upp í rúm. En taílenskt lúxushótel býður nú gestum sínum upp á gistingu úti í skógi með stórum fílahópi.

Það er þó ekki um það að ræða að gestirnir deili rúmi með fílunum en þeir gista í svokölluðum „Jungle Bubble“ sem eru gegnsæ, kúlulaga hús sem bjóða upp á allt það sem lúxushótel geta boðið upp á.

Það er hótelið Anantara Golden Triangle Elephant Camp & Resort sem býður upp á þennan gistimöguleika. Þetta kemur fram í fréttatilkynningu frá hótelinu. Gestirnir geta einnig fengið leiðsögn um frumskóginn þar sem þeir fá fræðslu um fíla og líf þeirra.

Húsin eru gegnsæ svo gestirnir geti virt fílana fyrir sér öllum stundum eða þá kannski að fílarnir virði fólkið inni í húsunum fyrir sér! Það eina sem ekki er gegnsætt í húsunum er salernisaðstaðan en reikna má með að flestir vilji vera aðeins út af fyrir sig þegar þeir sinna því sem sinna þarf á salerninu.

Gisting fyrir tvo kostar sem nemur um 70.000 íslenskum krónum nóttin.