Í lok október 2018 hvarf Anne-Elisabeth Hagen af heimili sínu í útjaðri Osló. Ekkert hefur spurst til hennar síðan og í síðustu viku var hún formlega skráð látin hjá lögreglunni sem vinnur enn að rannsókn málsins. Málið er ansi snúið en í fyrstu var talið að henni hefði verið rænt til að fá lausnargjald greitt en miðar með kröfu um greiðslu lausnargjalds voru skildir eftir á heimil Hagen-hjónanna daginn sem Anne-Elisabeth hvarf. Þau hjónin eru meðal ríkustu Norðmannanna og því eftir miklu að slægjast.

Rannsókn lögreglunnar miðaðist því í upphafi við að Anne-Elisabet hefði verið rænt en síðasta sumar fór rannsóknin í nýjan farveg þar sem lögreglan taldi þá orðið líklegast að hún hefði verið myrt þennan örlagaríka dag.

VG skýrði frá því um helgina að Tom Hagen, eiginmaður Anne-Elisabeth, hafi skýrt lögreglunni frá því að húslykill, sem var geymdur í bílskúrnum, hafi verið horfinn þegar hvarf eiginkonu hans uppgötvaðist. Lögreglan útilokar ekki að sá eða þeir, sem námu Anne-Elisabeth á brott og urðu henni væntanlega að bana, hafi komist inn í húsið með því að nota þennan lykil.

VG segist hafa heimildir fyrir að engin ummerki um innbrot hafi verið til staðar.

Talsmaður lögreglunnar staðfesti að lögreglan hefði fengið þessar upplýsingar en vildi ekki skýra frá hvaða áhrif þær hefðu haft á rannsóknina.