Allt útlit er fyrir að fulgaflensa sé að ná útbreiðslu í nokkrum löndum í Evrópu. Á mánudag tilkynntu yfirvöld í Þýskalandi að greinst hefði fulgaflensa í villtri gæs í Brandenburg í austurhluta Þýskalands, nálægt landamærunum til Póllands.

Samkvæmt þýskum yfirvöldum er um að ræða afar smitandi tegund fuglaflensu, sem nefnist H5N8. Það hefur þó ekki verið tilkynnt um nein smit í eldisfuglum. „Verkefnið sem við stöndum frammi fyrir nú er að koma í veg fyrir að eldisfuglar smitist af vírusnum“, segir í yfirlýsingu frá yfirvöldum í Brandenburg.

Austur-Evrópskur faraldur

H5N8 hefur að undaförnu greinst í eldisfuglum í nokkrum löndum í Austur-Evrópu. Síðan í desember hefur fuglaflensa greinst í hænsnum í Slóvakíu, Tékklandi, Ungverjalandi og Póllandi. Einnig hafa tilfelli fuglaflensu fundist í Úkraínu. Það getur verið kostnaðarsamt þegar fuglaflensa kemur upp í eldisfuglum. Það þarf að slátra dýrunum og því getur fylgt mikill kostnaður og tap fyrir ræktendurna.