Charles Merritt, karlmaður í Suður-Kaliforníu, var dæmdur til dauða í gær fyrir skelfileg morð á fjögurra manna fjölskyldu í febrúar 2010.
Merritt myrti fyrrverandi viðskiptafélaga sinn, Joseph McStay, eiginkonu hans Summer og syni þeirra hjóna sem voru þriggja og fjögurra ára gamlir. Lík þeirra fundust í grunnri gröf í Mojave-eyðimörkinni í Kaliforníu árið 2013, en í febrúar 2010 hurfu þau sporlaust. Mótorhjólamaður fann líkamsleifarnar fyrir tilviljun.
Charles var sakfelldur fyrir morðin í júní en nú hefur dauðarefsing verið kveðin upp í máli hans.
Charles hefur staðfastlega haldið fram sakleysi sínu í málinu og vill meina að saksóknarar hafi gert hann að blóraböggli. Saksóknarar sögðu fyrir dómi að Charles hefði tryllst þegar hann komst að því að vinur hans og viðskiptafélagi, Joseph McStay, ætlaði að ýta honum til hliðar í fyrirtæki sem þeir ráku saman.
Kviðdómendur höfðu mælt með dauðarefsingu í málinu og var dómari sammála því mati.
