Það er mikilvægt að fá góðan nætursvefn, þetta höfum við örugglega öll heyrt og lesið um. Rannsóknir hafa einnig sýnt að svefnskortur geti aukið líkurnar á sykursýki, hjarta- og æðasjúkdómum og tengist ótímabærum dauða.

Það er þó misjafnt hversu langan svefn fólk þarf. Flestir fullorðnir sofa í 7 til 8 klukkustundir á hverri nóttu. En það er til fólk sem sefur aðeins í fjórar klukkustundir og er samt sem áður við hestaheilsu.

Vísindamenn við Kaliforníuháskóla hafa fundið stökkbreytt gen sem stýrir hugsanlega svefnþörf fólks.  Þeir rannsökuðu gen 12 manns úr sömu fjölskyldu en þau sofa öll aðeins um 4,5 klukkustundir á hverri nóttu og virðist það duga þeim vel.

Stökkbreyting fannst í geni sem heitir ADRB1. Vísindamennirnir stökkbreyttu síðan geni í rottum og gerðu það eins og genið í fólkinu. Í kjölfarið sváfu rotturnar aðeins 55 mínútur á sólarhring að meðaltali.

Vísindamennirnir telja að stökkbreytiningi hafi ekki heilsufarslegar afleiðingar en þó sé erfitt að sanna það. Stökkbreytingin er ekki gömul og hefur því ekki dreifst sérstaklega mikið.