Frá því í ágúst á síðasta ári hefur verið óheimilt að hylja andlit sitt á almannafæri í Danmörku. Lögunum er ætlað að ná til múslímskra kvenna sem hylja andlit sitt með niqab eða búrku. Lögreglan hefur kært 39 fyrir meint brot gegn lögunum og nú er fyrsti dómurinn fallinn.

Hann féll í undirrétti í Álaborg. Þar var kona ákærð fyrir að hafa brotið fjórum sinnum gegn lögunum. Hún hafði meðal annars hulið andlit sitt með niqab þegar hún mætti á fyrsta skóladag barns síns.

Sekt við brotum sem þessum er 500 danskar krónur og hélt dómstóllinn sig við þá upphæð og sektaði konuna um 2.000 krónur fyrir þessi fjögur brot. Lögreglan taldi hana hafa brotið sex sinnum gegn lögunum en sjálf taldi hún sig hafa brotið gegn þeim einu sinni.