Á hverjum degi í þrjú ár reykti Maddie Nelson, sem nú er 18 ára, rafrettur. Hún birti myndir af reykingunum á YouTube og sýndi þar færni sína við reykingar og við að gera ýmsar brellur með reyknum. En þann 1. ágúst síðastliðinn var hún lögð inn á sjúkrahús í Utah í Bandaríkjunum vegna öndunarörðugleika, bakverkja og nýrnavandamála. Að lokum var henni haldið sofandi, svo alvarlegt var ástand hennar.

Bandarískir fjölmiðlar skýra sumir frá þessu sem og Maddie á Facebooksíðu sinni. Þar kemur fram að röntgenmyndir hafi sýnt að að lungu hennar voru mjög sködduð og var hún greind með bráðalungnabólgu. Þar hafði mikið af hvítum blóðkornum safnast saman og var það bein afleiðing af notkun rafretta að sögn lækna.

https://www.facebook.com/maddie.nelson.7549/posts/817576078637519

Maddie náði sér þó og hefur nú verið útskrifuð af sjúkrahúsi. Óhætt er að segja að veikindin hafi valdið algjörum viðsnúningi hjá henni varðandi rafrettur því nú beinir hún kröftum sínum að því að vekja athygli fólks á þeim hættum sem geta fylgt notkun rafretta. Ásamt systur sinni, Andrea, hefur hún sett GoFundMe-síðu á laggirnar til að dreifa sögu sinni og segja fólki að „rafrettur eru ekki hollur valkostur við venjulegar sígarettur“.