Þegar lögreglan birtist í hótelherbergi í Queens á Long Island í Bandaríkjunum í síðustu viku blasti lík við. Þetta var líkið af kokkinum Andrea Zamperoni en tilkynnt hafði verið að hann væri týndur. Búið var að pakka líkinu inn í sængurfatnað og setja það ofan í ruslatunnu þannig að aðeins fæturnir stóðu upp úr.

New York Times skýrir frá þessu. Í herberginu var vændiskonan Angelina Barini og var hún handtekin vegna rannsóknar málsins. En málið hefur undið upp á sig því það er talið tengjast láti tveggja manna til viðbótar á öðrum hótelum í Queens. Þeir menn, eins og Zamperoni, létust af völdum ofneyslu fíkniefna.

Lögreglan telur að tveir menn, samverkamenn Barini, tengist málinu. Annar þeirra er sagður hafa verið melludólgur hennar og hinn hafi útvegað henni fíkniefni. Þremenningarnir eru sögð hafa gefið mörgum viðskiptavina Barini fíkniefni og hafi síðan stolið frá þeim.

Barini segist hafa stundað vændi og hafi gefið Zamperoni fljótandi alsælu eftir að hann hafði greitt henni fyrir kynlíf.

Barini var úrskurðuð í gæsluvarðhald og getur ekki fengið lausn gegn greiðslu tryggingar. Hún er grunuð um að hafa dreift fíkniefnum sem innihalda hið umtalaða efni fentanýl sem er eitt umtalaðasta fíkniefnið í Bandaríkjunum í dag enda samofið ópíóíðafaraldrinum þar í landi. Efnið er 50 sinnum sterkara en heróín.