Óhætt er að segja að Matthew Disney, fyrrverandi hermaður í breska hernum, sé ekki vinsælasti maðurinn hjá tilteknum bæjarstjóra í Frakklandi um þessar mundir.
Disney ákvað á dögunum að klifra upp á Mont Blanc en hann hafði meðferðis stóra og mikla róðravél – eins vél og margir hamast á í líkamsræktarstöðvum landsins. Allt var þetta gert í góðum tilgangi en markmið Disney var að safna áheitum sem síðan runnu til góðgerðarmála. Raunar hefur Disney gert þetta víða á undanförnum árum og klifið mörg hæstu fjöll heims með róðravélina meðferðis.
Disney kom róðravélinni langleiðina upp en þurfti frá að hverfa vegna slæms veðurs þegar hann var skammt frá toppnum. Brá hann á það ráð að skilja róðravélina eftir uppi á fjallinu en það hefur ekki fallið vel í kramið hjá yfirvöldum á svæðinu.
Jean-Marc Peillex, bæjarstjóri í nágrenni fjallsins, segir að Disney sé „brjálæðingur“ sem hafi mengað fjallið með því að skilja róðravélina eftir. Gerði hann grín að nafni Disney og sagði hann að Mont Blanc væri sko enginn Disney-skemmtigarður. Þá sagðist Peillex ætla að senda breska sendiráðinu reikning upp á tæpar 300 þúsund krónur fyrir að koma vélinni niður.
Sjálfur segir Disney að viðbrögð bæjarstjórans séu allt of hörð. Hann hafi þurft að skilja vélina eftir vegna veðurskilyrða en ætlun hans hafi verið að ganga aftur upp og sækja hana. „Ég myndi aldrei skilja eftir mig rusl – hvað þá fjöllum sem ég hef mikla ástríðu fyrir,“ segir hann.
Óvíst er hvernig og hvenær róðravélin verður fjarlægð af fjallinu en Peillex lét hafa eftir sér í viðtali í vikunni að Disney fengi ekki að snúa aftur á fjallið.