Föstudagsverkföll og mótmæli vegna aðgerðarleysis í loftslagsmálum hafa staðið yfir um hríð og var Ástralía meðal fyrstu ríkjanna þar sem mótmæli af þessu tagi fóru fram. Síðasta föstudag tóku um 100.000 manns þátt í mótmælum í Melbourne, 80.000 í Hyde Park í Sydney og 22.000 í Hobart. Að mótmælum loknu birtu samtökin The Australian Youth Coal Coalition mynd af umgengninni í Hyde Park í Sydney og hneyksluðust á umgengninni.

„Svona mikið rusl skildu loftslagsmótmælendur eftir sig í hinum fallega Hyde Park garði. Svo mikið plast. Svo mikið rusl. Svo sorglegt.“

Skrifuðu samtökin með myndinni á Facebook en á henni má sjá rusli þakinn almenningsgarð. Einnig sögðu samtökin að þau hefðu tekið til hendinni og hreinsað Hyde Park. Myndin fór á mikið flug í netheimum og var deilt 34.000 sinnum á skömmum tíma og um 10.000 athugasemdir voru skrifaðar við hana.

En sumum fannst þetta nú eitthvað skrýtið og fóru að skoða málið betur og komust að hinu sanna. Myndin var svo sannarlega tekin í Hyde Park en bara í Hyde Park í Lundúnum á Englandi. Hún var heldur ekki tekin eftir mótmæli umhverfisverndarsinna heldur eftir árlega samkomu kannabissamtaka í apríl síðastliðnum.

Daginn eftir þá samkomu létu samtökin The Hemp Trading Company kannabisfólkið heyra það fyrir umgengnina og sögðu að það hefðu verið umhverfisverndarsinnar úr Extinction Rebellion hreyfingunni sem hefðu þurft að þrífa garðinn.

Nú hefur The Australian Youth Coal Coalition eytt færslum sínum af Facebook og hefur ekki svarað spurningum fréttamanna um málið sem lítur ekki vel út fyrir samtökin.