Kínversk yfirvöld eru byrjuð að fjarlægja íslömsk tákn af moskum og grafstæðum í landinu. Auk þess hafa tugir moska verið jafnaðar við jörðu. Þetta hefur meðal annars verið gert í innri Mongólíu, Hena og Ningxia en í síðastnefnda héraðinu býr stærsti múslimski minnihlutinn í Kína, Huiene, en um 20 milljónir múslima búa í Kína.

New York Times skýrir frá þessu auk fleiri fréttamiðla. Í grein á vef Hudson-stofnunarinnar skrifar múslimski prófessorinn Haiyun Ma grein þar sem hann segir að Kínverjar séu nú orðnir stærstu dreifingaraðilar and-íslamskrar hugmyndafræði og haturs í garð múslima.

New York Times segir að þetta séu nýjustu aðgerðirnar sem snúa að því að takmarka trúfrelsi í Kína. Á undanförnum áratugum hafa yfirvöld verið frekar frjálslynd hvað varðar að leyfa fólki að stunda trúarbrögð sín en nú er verið að þrengja að. Ástæðan er sögð vera að yfirvöld óttast trúarlega öfgahyggju. Stjórnvöld hafa einnig bannað notkun arabísks leturs í Kína.

Í leynilegum fyrirmælum frá Xi Jinping, forseta, frá því á síðasta ári segir hann að yfirvöld um allt land eigi að sjá til þess að öll trúarbrögð í landinu séu undirgefin hinum veraldlegu yfirvöldum landsins.