Þessa dagana er áður óþekkt halastjarna á fleygiferð í gegnum sólkerfið okkar. Hún er eins og snjókúla úr frosnu gasi og ryki og geysist áfram á mikilli ferð. Það er ekki hægt að sjá hana með berum augum. Það var áhugamaður um stjörnufræði sem uppgötvaði hana í ágúst.

Vísindamenn telja að halastjarnan hafi komið hingað frá öðrum sólkerfum og hafi verið á ferðinni í milljónir og hugsanlega milljarða ára.

Forbes segir að The Minor Planet Center stjörnufræðistofnunarinnar í Massachusetts í Bandaríkjunum hafi staðfest tilvist halastjörnunnar í síðustu viku og gefið henni nafnið C/2019 Q4 (Borisvo).

Borisov er aðeins annar hluturinn frá öðru sólkerfi, að því að best er vitað, sem kemur inn í sólkerfið okkar. Hinn var hinn vindlingslaga Oumuamua sem fór um sólkerfið okkar 2017. Vísindamenn höfðu aðeins nokkrar vikur til að rannsaka Oumuamua því hann uppgötvaðist ekki fyrr en hann var á leið út úr sólkerfinu. En Borisvo er á leið inn í sólkerfið þessa dagana og gefur frá sér sex sinnum meiri birtu en Oumuamua. Vísindamenn munu því hafa marga mánuði til að rannsaka Borisov.