Skansenakvariet er dýragarður og þótti henta vel undir karlakvöldið. Þegar um klukkustund var liðin af því stillti hinn 79 ára Lars Liedegren sér upp í stiga framan við plexíglerið í krókódílabúrinu.
„Ég er ekki mjög hávaxinn svo ég fór upp í stiga til að vera aðeins hærra uppi. Hugmyndin var að ég ætlaði að syngja eitt lag en ég var ekki byrjaður þegar krókódíllinn beit um vinstri handlegg minn. Þetta var eins og fallbyssuskot. Ég átti ekki möguleika á að losa mig.“
Sagði hann í samtali við Aftonbladet.
Krókódíllinn hafði einfaldlega hoppað yfir plexíglerið og kastað sér á handlegg Liedegren sem sneri baki í dýrið.
„Það varð algjör þögn, það var bara ég sem öskraði.“
Sagði hann. Síðan þróaðist málið þannig að úr varð eitthvað sem má helst líkja við reipitog á milli krókódílsins og gesta herrakvöldsins.
Liedegren sagðist hafa haft á tilfinningunni að krókódíllinn hafi ætlað að draga hann yfir plexíglerið en gestirnir hafi reynt að losa handlegginn úr kjafti krókódílsins. Það tókst að lokum og var Liedegren fluttur beint á sjúkrahús. Nauðsynlegt reyndist að taka handlegginn af honum.